ఒక్క క్షణం ఆగిచూడు....నీ కాలెటు పోతోందో!
రాళ్ళకు వెరవక పరుగెడుతోందో..?
పువ్వుల నవ్వుల మసి చేస్తోదో..!
ప్రగతి పథమ్మున పయనిస్తోందో..?
పిపీలికాలను బలితీస్తోందో..!
ఒక్క క్షణం ఆగి చూడు.... నీ చెయ్యేంచేస్తోందో!
కమిలిన మనసుకు మందేస్తోందో..?
విషజ్వాలలకు నెయ్యేస్తోందో..!
శాంతిసుమాలను అందిస్తోందో..?
కొడవలి పట్టుకు నరికేస్తోందో..!
ఒక్క క్షణం ఆగి చూడు.... నీనాలుక ఏమంటోందో!
మంచిని పెంచే మాటిస్తోందో..?
కత్తులుదూసే కథ చెబుతోందో..!
సమభావాలకు లోబడి వుందో..?
అదుపు లేక అది పరుగెడుతోందో..!
ఒక్క క్షణం ఆగి చూడు.... హృదయంలో ఏందాగుందో!
మద లోభాలను తుడిచేసిందో..?
'ఆవేశం ' గా మార్చేసిందో..!
సత్యం పూర్తిగ గుర్తించిందో..?
తన ఊహలనే నిజమంటోందో..!
No comments:
Post a Comment