సడి

శ్రీ చావా కిరణ్ గారు ఇచ్చిన సన్నివేశానికి (ఇక్కడ చూడండి) నాకు తోచిన పాట.

సడి.. చిరు సడి ..వినబడి
అదే పాటుగా .పాటగా ..నిలబడి.. వినబడి  ||సడి||

గుండియలోన జారిన కన్నుల నీటి తడి
తుడిచిన చల్లని గాలి ఒడి                 ||సడి||

గగనపు గుడిలో మబ్బుల గడిలో
ఆడే గువ్వల సవ్వడులు

వడివడి అడుగుల జలతరంగముల
బేడిస గుంపుల సందడులు

వినువీధులలో విహరించేందుకు
విధి చేతలనే వివరించేందుకు
పదపడి రేపే తలపుల తాకిడి

సుడి.. అలజడి.. తొలగిడి
అదే పాటుగా .పాటగా ..నిలబడి.. వినబడి  ||సడి||

కడిమి వనములో తడబడు నడకల
వెదుకులాడెనే అలికిడినో

నిబిడి శాంతిలో గుడిసె నీడలో
వెలువడే నదే తెలివిడియో

శిలశిల్పమ్మౌ ఇడుగడలెన్నో
కుడియెడమలలో యెడమెంతో
ప్రకృతి బడిలో నిశ్చల పోడిమి

ముడి .. విడివడి.. తనివిడి
అదే పాటుగా .పాటగా ..నిలబడి.. వినబడి  ||సడి||