ప్రయత్నిస్తున్నా...
ఏకాంతంగా .. సందడిగా
వాళ్ళ మాటల్లో
నా చేతల్లో….
ప్రయత్నిస్తున్నా
దేవునిపటం ముందు
అద్దం ముందు
రక్తం త్రాగుతున్న దోమ కడుపులో ఎర్రదనాన్ని చూస్తూ
ప్రకృతిని చూస్తూ...చిన్నగా చూస్తూ..
నోటితీట మాటల్లో
మౌన వికారాల్లో …
ప్రయత్నిస్తున్నా
అమ్మాయల సౌందర్యం చూస్తూ ... ఉత్తేజంతో
ప్రయత్నిస్తున్నా
నిర్లిప్తంగా శూన్యాన్ని చూస్తూ ...
ప్రయత్నిస్తున్నా
క్షణాలకు బానిసనై
కాలం కదలికలని అస్తవ్యస్తంగా గుర్తిస్తూ …
ప్రయత్నిస్తున్నా
రాయిలా... స్థిరంగా...
ప్రయత్నిస్తున్నా
రాయిలా... దొర్లిపోతూ...
ప్రయత్నిస్తున్నా
రంగులకలలో పరిభ్రమిస్తూ
చీకటి గుహలో ప్రతిధ్వనిస్తూ
ఛీ కొడుతూ.. జై కొడుతూ .
ప్రయత్నిస్తున్నా..
అహంకారం తొడుక్కునే ముసుగుల సంఖ్యను లెక్కిస్తూ
బాధ.. ఆనందం.. అనుభూతుల ఆంతర్యాల వెనుక
ప్రయత్నిస్తున్నా
ఈ ప్రయత్నం ఎందుకో ?…తెలియని నిర్వేదంలో
తెలిసిన ఆ ఉద్వేగపు ఘడియలలో
తెలిసీ తెలియని సహజస్థితిలో
నాక్కూడా తెలియకుండానే
ప్రయత్నిస్తున్నా.. ప్రయత్నిస్తూనే ఉన్నా... నన్ను చూడాలని
