చేతిలోన గీతలున్నా తలరాత మారుతుందా
నింగిలోన తారలున్నా పెనుచీకటి ఆగుతుందా ||చేతి||
ఎండలోన నడిచి నడిచి అలసి సొలసి పోతావు
నీడలోన ఆగిపోయి దారి కదలదంటావు
ఎన్ని అడుగులేసిపోయినా లేని చివర దొరుకుతుందా || చేతి ||
తడియారిని గుండెకై నీటికొరకు చూస్తావు
నీరులేక కంటినీరు ధారగా చేస్తావు
నీటి చుక్కలెన్ని ఉన్నా ఎడారి నేల పొంగుతుందా || చేతి ||
కాగితాన్ని నావచేసి కడలి దాట చూస్తావు
కోర్కెల సుడిలోన చిక్కి మునిగి మాయమౌతావు
గాలిలోన దీపముండగా ఆరకుండ వెలుగుతుందా || చేతి ||
ఆకాశపుటంచులకై ఎగుర సాహసిస్తావు
స్వర్గానికి నిచ్చెనేసి నడుమజారిపడతావు
చేయి ఎంత ఎత్తు చాచినా అంబరాన్ని తాకుతుందా || చేతి ||
మూడునాళ్ళ బ్రతుకు చూసి మురిసి మురిసి పోతావు
ఆశలెన్నొ పెంచుకుని ఎగసి ఎగసి పడతావు
బ్రతికినేళ్ళు ఎన్ని ఉన్నా చావు ఘడియ ఆగుతుందా || చేతి ||
No comments:
Post a Comment